Morgan Stanley dollar üzrə proqnozlarını aşağı salır 08.09.2010 09:33

Valyuta bazarlarındakı durumu şərh edən Morgan Stanley mütəxəssisləri qeyd edirlər ki, dolların son günlər mövqelərini möhkəmləndirməsinə baxmayaraq artım potensialı kifayət qədər məhdud görünür. Qeyd edək ki, bank rəsmiləri daha öncə dekabr ayının sonunadək EUR/USD məzənnəsinin $1.16 səviyyəsinədək enəcəyini proqnozlaşdırırdılar. Lakin dərc edilən son iqtisadi xəbərlər və FRS rəsmilərinin bəyanatları fonunda qurum proqnozlarına bir sıra dəyişikliklər etmişdir. Hazırda Morgan Stanley mütəxəssisləri yeni stimullaşdırma tədbirlərinin ABŞ iqtisadiyyatında dirçəliş yaradacağını proqnozlaşdırır və bu səbəbdən ilin sonunadək EUR/USD məzənnəsinin $1.36 səviyyəsinə yüksələcəyini ehtimal edirlər. Belə ki, 2011-ci ilin I rübü üzrə proqnozlar $1.12 səviyyəsindən $1.32 səviyyəsinə, II rüb üzrə proqnozlar $1.12 səviyyəsindən $1.28 səviyyəsinə, III rüb üzrə proqnozlar isə $1.14 səviyyəsindən $1.26 səviyyəsinə yüksəldilmişdir. Qeyd edək ki, 2011-ci ilin sonunadək EUR/USD məzənnəsi üzrə proqnozlar $1.24 səviyyəsindən $1.17 səviyyəsinə endirilmişdir.