Avroda likvidliyin artması, həmçinin faiz dərəcələrinin və gəlirlilik səviyyəsinin azalmasını nəzərə alaraq Morgan Stanley mütəxəssisləri bu il avronun məzənnəsində eniş dinamikasının davam edəcəyini proqnozlaşdırırlar. "Avrozona ilə müqayisədə ABŞ-ın daha sürətli iqtisadi inkişaf tempi dollarla avro arasındakı gəlirlilik diferensialını artırır ki, bu da yaxın gələcəkdə EURUSD məzənnəsində eniş dinamikasının davam edəcəyi ehtimalını artırır. AMB tərəfindən likvidliyin artırılması avronun məzənnəsinə müsbət təsir göstərməyəcəkdir. Belə ki, bazara çıxarılan əlavə likvidlik banklar tərəfindən yenidən maliyyələşdirmə məqsədləri üçün istifadə ediləcəkdir ki, bu da real sektora o qədər də ciddi təsir etməyəcək" - Morgan Stanley mütəxəssisləri qeyd edirlər. Bankın analitikləri AMB tərəfindən faiz dərəcələrinin 0.5% səviyyəsinədək azaldılacağını və geniş müqyazlı iqtisadi stimullaşdırma tədbirlərinin həyata keçiriləcəyini proqnozlaşdırırlar. Beləliklə, Morgan Stanley dollarda alış əməliyyatlarını daha perspektivli hesab edir. Bank mütəxəssisləri 2012-ci ilin sonunadək EURUSD məzənnəsinin 1.15 səviyyəsinədək enəcəyini proqnozlaşdırırlar.
