Yunanıstanla bağlı müxtəlif xarakterli xəbərlərin dərcinə baxmayaraq bazar ertəsi EURUSD məzənnəsi 3 həftəlik maksimum səviyyəsinə yüksəlmişdir. Qeyd edək ki, dünən ticarət sesiyası ərzində avronun 16 əsas valyutadan 13-ü qarşısında məzənnəsi yüksəlmişdir. "Hazırda bazar iştirakçılarının böyük əksəriyyəti ticarət qərarlarında ehtiyatlı davranırlar. Belə ki, riskli aktivlərlə eyni zamanda avronun da məzənnəsinin yüksəlməsi yaxın gələcəkdə Avrozona ilə bağlı müsbət fundamental xəbərlərin dərc ediləcəyi ehtimalını artırır." - Bank of New York Mellon baş valyuta strateqi Maykl Vulfolk bildirir. "Böyük ehtimalla bazarda Avrozona ilə bağlı xəbərlərə qarşı həssaslıq yüksək həddə qalmağa davam edir. Lakin bir müddət öncə EURUSD məzənnəsində eniş proqnozlaşdıranların böyük əksəriyyəti artıq proqnozlarını yenidən dəyərləndirməyə başlamışlar" - o, əlavə etmişdir. Qeyd edək ki, ötən həftə EURUSD cütündə yaranmış məzənnə artımına baxmayaraq spekulyativ satış əməliyyatlarının sayı nəinki azalmış, hətta artmışdır. Bu isə qiymətlərin yenidən artması durumunda artım tendensiyasını dəstəkləyəcək növbəti katalizator rolunu oynaya bilər.
